Bidayuh berunding enggau SUPP bekaul Chermin MPP

April 4, 2010, Sunday

KUCHING: Siku ari tuai raban bansa Bidayuh madahka diri bisi berunding enggau Gerempung Sa’ati Rayat Sarawak (SUPP) pasal pematut penuduk Chermin Majlis Perbandaran Padawan diberi ngagai Bidayuh.

Ku iya, ba runding nya dia iya madahka SUPP patut meri awak ngagai tuai ari raban bansa nya mangku penuduk nya ngambika tau ngenyelapka penemu bala sida tu.

“Aku udah bisi mansutka penemu ngagai SUPP pasal pematut penuduk nya diberi ngagai Bidayuh ngambika ngenyelapka ati raban bansa nya.

“Kelimpah ari nya mega iya kena masa sukung enggau nulung raban bansa nya ngemansangka SUPP ngelama tu ti udah,” ku iya lebuh ti bejaku ngagai surat kabar tu kemari.

Tuai raban bansa tu ti enggau dibantaika dama madahka, berindik ari runding nya dia iya pechaya ka SUPP deka ngelantik siku tuai politik dalam parti nya deka dipadu mangku penuduk tu ila.

Penuduk nya puang udah bekau chermin iya Tan Joo Phoi dipaduka nyadi Penulung Menteri ba Opis Kepala Menteri.

Udah lepas nya berita ti sebubu madahka SUPP deka ngelantik Tuai Pengerembai Berita parti nya, Datuk Alfred Yap mangku pengawa nya.

Taja pia bisi mega berita ti madahka Kaban Kunsil Nengeri Bengoh, Dr Jerip Susil mega patut dilapduka mangku pengawa nya.

Presiden SUPP Datuk Patinggi Tan Sri Dr George Chan apin lama bisi mansutka penerang deka madahka dama orang ti deka dipadu mangku penduduk nya ba bulan tu.

Rambau nya iya mega enda belalai madahka orang bumiputera ti bisi ba parti nya tau mega dipadu mangku pengawa nya.

Beserimbai enggau tu sekeda raban ti nyukung Datuk Alfred Yap bisi mega ngenataika peminta diri ngasuh ngelantik tuai sida nya nganti Tan.

(sumber: http://www.theborneopost.com/?p=21557)