meruik-wik-wik

Babi

From IbanWiki - an Iban Encyclopedia

Jump to: navigation, search

Lambar tu agi bedau engkeman lalu agi begunaka penerang ti bisi reference nyemetak. Bantu kami ngerembaika lambar tu ngena jalai nambah info ti tegap. Sebarang penerang ti enda tegap lalu agi ulih dipejuraika enda tau diengkah ditu. Kita tau bejuraika penerangnya ba discussion. (Dec 2008)

Babi

English: Pig, hogs, swine
Malay: Babi, khinzir
Nama Bukai: Jani (Jani')
tauka Uting. Sepil bukai ti salah: Janek, Janik, Jani',

Babi disengkaum dalam jelu Vetebrata enggau Omnivor ti pandak kaki, bisi junggur sereta ngembuan idung ti rempi. Babi bisi mayuh macham bansa lalu iya ti pemadu suah dipeda kitai Iban iya nya babi kampung enggau babi menua. Kelimpah ari nya, bisi mega babi bansa babi bukai baka babi china.

Bansa babi

1. babi belang - babi ti bechura burang tauka bebelang
   
2. babi china - babi ti ditupi china tauka babi import
   
3. babi dupan - babi tupi, babi tuai betaring panjai
   
4. babi indu - indu babi ti chukup besai
   
5. babi emperingat - babi ti beumur setaun
   
6. babi kampung - babi babas (ukai diau ba menua - anang saru)
   
7. babi karau - babi ti baru sebulan
   
8. babi ngelampai - babi lelaki ti beumur dua taun betaring bingkuk
   
9. babi menua - babi ti ditupi
   
10. babi nyepan - babi ti melangkan ba pantai /tanah
    
11. babi bandam - babi kampung ti besai sereta mangah
    
12. babi sambas - babi china ti besai sereta dijual ba maket.
    
13. babi menua (domestic pig in Iban settlement) endang datai ari babi kampung (wild boars) ti ditupi bala Dayak.
14. Babi Sepa - babi ke udah kala beranak¹

¹Peda Pengarap Iban

Pengarap

Babi endang suah sengki dalam ngaduka pengawa pengarap bansa Iban sereta pengarap bukai ba dunya tu. Bisi ngumbai babi ngemai reti ti manah lalu sekeda ngumbai babi tu ngemai penusah ngagai pengidup sida.

Pengarap Iban
Kitai Iban ngembuan mayuh penti pemali ti bekait enggau babi. Pia mega babi semampai nyadi genselan dalam pengawa miring enggau begawai.

Jaku kena kitai Iban nyema tauka nyebut pemesai babi;

1. Agi besurik
2. Baru emperingat
3. Baru tumbuh munung(babi babas)
4. Serenti(serenti pemanjai taring udah pansut)
5. Semaut(semaut taring udah pansut)

Babi Sepa - babi ke udah kala beranak, ambika banding; tiga kali sepa reti nya babi indu nya kala udah beranak. Lalu pia mega selalu orang ngena "Babi Sepa" nya kena ngintu ngemparu pengawa begawai, ngintu pemali tauka pengawa ke bukai nitihka adat siti-siti.

Leka Jaku

1. Leka jaku babi ba jaku Iban dipasuk dalam raban Jaku Nama. Iya dikena kitai meri nama ngagai jelu.
   
2. Leka jaku babi mega tau nyadi leka jaku adjektif. Chunto: Iya gemu baka babi. Iya makai munyi babi.
   
3. Tau mega dikena nganu orang lebuh belaya. Chunto: 'Babi dek nya!

Nyadi taring babi ke "nyadi" tau diambi nyadika pengaruh kenu ku pengarap lama kitai Iban. Mayuh macham pengaruh tau nyadi ari taring babi ke nyadi. Bisi nya nyadi pengaruh "anak lelaki", reti nya pengaruh kena ngayau baka kebal, empelias, pemampul bedil, pemerani..etb..

Bisi ga utai ke baka belulang, kurang lebih mesai tapa, ti selalu ditemu orang ba perut raya babi, nya dikumbai orang "tikai babi" lalu guna iya endang nyadi ke pengaruh "anak lelaki"

Orang kelia udu naruh taring babi/rang babi taja iya ukai nyadi ke pengaruh tang semina dikena ngias dinding tauka kena ngingatka/ngitung berapa iku babi udah ulih sida ngasu/nimbak tauka ulih ngena chara ke bukai.

Atau babi menua tau dikena orang "nyenaga" enti maya orang bisi niri ke gawai tauka betilik nasit.

Sempama Jaku

Leka jaku babi tauka jani mega bisi dikena Iban berandau dikena sida nyilupka penemu tauka jaku ti kasar.

1. "Berani babi" ti nerangka reti orang ti berani amat tang nadai ngembuan akal sereta enda bejimat.
2. "Nganjung paung empa jani" nerangka reti orang ti jai nasit tauka nganjung penguntung ngagai orang bukai.
3. Nai Babi iya nya jaku kena nerangka pemansau buah kayu baka buah kemanti/remutan, sibau.
4. Nyau mansai ripu. Mansau endar. Nyau mansau redam "Nai Babi"
5. Riri Jani Makai Tai nya jaku sempama kena nerangka orang ke ngereja pengawa/penyalah selalu deka ngulang ngereja pengawa nya laban udah riri baka jani/babi ke riri makai tai.
6. Maki Iku Babi nya sempama kena nerangka pendiau orang ke enda entap, seruran pindah kin kitu. Diau din enda ga lama, diau dia enda lama lalu diau ditu pan enda lama mega. Seruran kuit-kuit baka iku babi/jani.