Rumah Kita Iban Selalu Angus Nama Tulong Perintah ?

Rumah kitai Iban selalu angus nama tulong perintah?
Written by Edward Awan - www.edwardawan.com
Tiap taun kitai ninga bisi aja rumah kitai Iban di menua persisir retung angus laban api, maioh agi ari semua penusah tu semua reta tengkira enda ulih diselamat laban api jampat makai tambah mega laban nadai cara ka madam ka api ketegal nadai kerkas kena bejaga ari penusah angus laban api.
Balai Bomba mina bisi di pasar ke besai, nyadi tu jauh ari geturong rumah panjai tambah ka enggau jalai ke enda meruan lalu nadai paip ai, enti nyema bisi rumah panjai angus endang tetap enda ulih diselamat ka bomba. Taja pin rumah panjai selalu bisi angus tiap taun tang perintah menua Sarawak nadai bisi ngaga program mantu sida di rumah panjai bejaga ari penusah angus laban api, baka meri pemadam api ka tiap pintu, meri tunjuk aja cara ngena pemadam api lalu bejaga ari api.
Selalu nya kitai meri bantu ngagai sida ke udah angus nya enggau macam macam utai tang lapa kitai enda berunding ka meri ajar ka sida penuduk rumah panjai bejaga ari penusah laban api sebedau utai tu nyadi…prevention is much better then cure.
Nyadi kami sebuat ki kerja diplantar minyak & gas F23 ari kompeni Shell, betuai ke aku empu Edward Awan lalu ngaga program tiap taun mantu sida rumah panjai bejaga ari penusah laban api cara volunteer maia ke offduty bepayung ba Shell with the Community Services “We Care We Share” Program. Duit kebelanja kena ngaga program tu endang duit gumpul kami tiap bulan ke kena meli pemadam api ke diberi ngagai sida rumah panjai.
Ba enam buah rumah panjai ke udah digagai kami ke endur ngaga kempin bejaga ari penusah laban api tu, semua tuai rumah enggau bala penuduk sida endang madah ka diri meri besai terima kasih laban pemeri ari kami nya amat berega endar, ku sida iya selalu sida minta pemadam api ari opis perintah tauka YB’s maia ke niki rumah sida tang janji mina tinggal janji.
Ku sekeda ari sida rumah panjai madah tau enda perintah meri sida project bukai tang meri sida pemadam api nya dulu laban sida nemu diri tusah amat ka madam api enti nadai nya.
Pemadam Api tu enti ba pasar endang mesti bisi baru permit rumah kedai tau di keluar tang nama kebuah perintah enda meri tumpu ngagai sida dirumah panjai, patut iya sida di beri siti sepintu awak ka bisi kena sida bejaga ari penusah laban api, sida iya dirumah panjai pin sama mega mayar cukai pintu.